哈，唔駛講喇掛 ~

多得大比帶挈可以去睇奧運馬術，當然，要付出沉重嘅代價。晨咁早去大學站搭車入場，眼瞓到爆，唔，預咗會悶，但睇睇又覺得其實都OK好睇嘅，係睇唔明啫。

仲以為公司會有個booth擺響會場度，點知搵極都搵唔到，個logo仲細到不得了，原來我哋唔係大會贊助商，而係大會獨家供應商，hohoho~

會 考放榜，對於成近卅歲嘅我嚟講，應該冇咩"啦lung"。但撞啱外甥今年放榜得13分，打緊風都仲響學校門口排隊諗住搏下，至發覺，其實我都算係幾好彩嘅 人。當年第一年會考得嗰11分，以為掛住華仁仔排頭實有人收，典知 ~ 身邊個個都升到中六，得我一個要repeat，難受梗有嘅，出開嚟都唔知佢哋講緊乜。

可幸嘅係，當年屋企都仲未家道中落，尚算小康，夠錢同埋肯dumb三千幾蚊出嚟俾我去新法repeat。畢竟都係一段令人牙癢癢嘅回憶，冇佢我識唔到阿嫂阿頂佢哋，識唔到阿嫂就識唔到小飛碟同雪芳，更加識唔到姐姐。

人生就真係咁奇妙，如果當日夾硬升咗上去，我嘅人生，可能又未必會係咁走。去唔到莊記，識唔到cherry佢哋，去唔到浸會，就跟唔到Professor Lai同周兆祥，就唔會有今日嘅我。一層一層咁砌上去，少咗其中一忽，就唔係依家嘅我。

突然間好似好有感觸𠻹，外面風大兩大，希望外甥咁用心嘅等待唔會係白費啦。

近排溏心熱潮好似好hit咁，有人晚晚番屋企追，唔，我呀，OK啦，好少追電視劇，大嗱嗱幾廿集，點追？與其睇埋啲人工嘢，我寧願打真軍，睇真人版，好睇好多。初時睇Big Brother係睇澳洲版，貪佢集集都有出浴鏡頭，呢水睇番美國版，一個字，正。

仲以外國人比較straight forward，原來玩攻心計都幾有層次，明爭暗鬥，門前擺花門後擺刀，請君入罋，人前攬頭攬頸入到房又係另一個樣，學嘢係時候。今水輪到我最愛嘅Memphis俾人擺上枱，唔知會唔會俾人out出局呢？

Big Brother website : http://www.cbs.com/primetime/big_brother/

熱爆，間屋熱到想溶咁。開行冷氣都仲係覺得好熱，下年要換喇個冷氣。驚三貓熱過頭會中暑，等登加咗幾舊冰落啲水度俾佢哋飲，可惜天氣實在太熱，冰都溶埋，唉，快啲落雨涼番啲啦 ~
 

花咗一日將iMac裡面所有file都過哂去新嘅hard disk度，早知唔慳嗰百幾蚊買個fire wire啦，應該速度會快好多。Anyway，唔買都買咗咯，都OK嘅，係過嘢嗰陣要等一陣咁囉。

過 哂所有嘢之後，個Safari依舊慢，頂唔順，卒之忍唔住要過檔Firefox。初初買Mac嗰陣都有用過一陣Firefox，但用用下又覺得 Safari個界面好似型啲，半途出家。可惜，捱唔過年，好多add on都support唔到。最煩係次次上親PPS都要reload幾次至出到字，都係Firefox多嘢玩啲，可惜用家大多數都係non-Windows user，好嘢少人用，冇陰公 ~

 等咗大半個月嘅貓糧終於抵港，唔怪得啲人咁貴都走飛機啦，日本咁近都要成廿日至到。由於今次主力訂貓小食，所以睇落好似好細盒咁，大嗱嗱成二千個大洋就咁冇咗喇，我不斷咁安慰自己，食一年㗎嘛，貴啲都值嘅。訂得最多最嘥位嘅依係Sheba小食，慣哂嘴，晚晚都開一包俾佢哋食，依家一聽到聲就已經識走位等食。

悶咗一排，啲美國人又開波喇。一班美國人玩奬門人會係點？好睇囉。首先唔可以唔佩服日本人嘅創意同埋創造力，相比之下，奬門人真係七個一皮。難得啲美國人又肯陪佢顛，有幾分似筋肉檑台，但轉咗format。

做咗四集，最鍾意夾公仔嗰集，可以嘅話，我都想試下 ~

諗緊如果大吉利是搵唔到工，好唔好八月尾去個短旅行呢？陽光與海灘絕對係必要，曼谷平靚正，浮羅交怡又可以行埋吉隆坡，沙巴做緊promote又OK平喎，典揀好呢？但係九月頭又出Infinite Undiscovery喇喎，好唔好唔去旅行買Xbox呢？