近排最愛，鹽酥雞肉燥撈麵 ~
差唔多個個禮拜都會去朝聖一次 ~

肉燥夠濃，鹽酥雞夠酥，
加埋椰菜酸菜，正到爆 ~

感受台灣，唉，好想去旅行呀 ~

尋日倒數完諗住食糖水過番個甜蜜蜜嘅新年，典知 ~ 爆嬲。石磨坊多人，去咗斜對面嗰間糖百府，睇餐牌見到三隻字 - 棉花冰，莫非係市林嗰啲綿綿冰？諗都冇諗就叫咗碟，齌睇外型真係靚到絕，但一入到口呢 ~ 咦，原來唔係嗰樣嘢嚟，好硬身，仲淡，一啲都唔綿，啲紅豆硬繃繃，朱古力醬又少，好似飲咗一大碟朱古力奶水。另一碟士啤多梨就好啲，但真唔算得上係好嘢， 幾廿蚊㗎嘛，呃錢冇緊要，最緊要嘅係呃咗我嘅驚喜嘛 ~ 幾廿歲，買少見少㗎嘛 ~

早兩日upload咗唔記得放，
真係超仔細㗎 ~ 靚過好多D-cam ~

搵咗個幾禮拜嘅免提終於入手，爆靚仔，仲平 ~
粉紅色真身原來好假，好彩冇買到 ~

最開心竟然可以connect埋部iMac，
哈，痾屎都可以聽歌 ~

感受下800萬CCD嘅威力啦 ~

霎時間好多細個睇開嘅卡通都出番嚟，IQ博士孖住龍珠上NDS，筋肉人上PS2 ~
超開心 ~

嚟咗Schenker之後，一直都好少花心機去decorate我張枱，事關實在太細喇，根本冇吉位可以擺古怪嘢，冇咗塊partition就已經差好遠 啦。早兩日試新機嗰陣多手影咗幾張相，睇番至發覺，我張枱越嚟越似以前咁，成枱都係無謂嘢。知我性格嘅人都知，我一向都好neat & tidy，我字典上冇亂呢個字。你哋睇下我張枱幾stylish，so me ~

以前響U仔張枱係大楷L字，後面仲有個櫃擺零食 ~

最愛Frog style同橙鳥，Unazukin失寵咗好多年 ~

親愛嘅Mr I,

　 　離開咗你都有幾日喇，別本無恙嘛？新主人對你好唔好呀？一個人要變總有藉口嘅，只怪你影相唔夠靚，每一次upgrade都攪到我好攰，㩒實呢個掣又放開 嗰個掣，但到最後竟然係乜都冇哂。對於一個Mac人嚟講，Mr I你確實係幾方便好用嘅，但你精美嘅外型，始終彌補唔到你設計嘅遺憾。咁嘅年代，竟然仲有部手機係冇電話繩位，就係因為咁，所以跌到你成身花哂，這些你都 明白嘅啦 ~

　　再見喇，Mr I，我同金光閃閃Mr F相處so far so good，勿念 ~

三 貓當中，論人氣度，黑咪一向偏低。唔好講其他人呀，屋企人個個都鍚哂阿豹，讚佢夠乖夠純。嗲精比比一味靠嗲都搶到唔少分，唯獨黑咪性格孤僻一直都得唔到人 歡心。其實如果講乖，黑咪都唔輸蝕，成日自己柄埋一二邊瞓覺，唔嘈唔煩唔扭計，可惜成身黑掘掘個個都嫌佢邪釘唔like佢，作為貓奴嘅我一直都唔係咁開 心。

親愛嘅Mr F,

　 　你仲記唔記得，我哋點樣認識㗎？嗰朝睇完馬術，有幸響街頭度遇見你，瞬間愛上。相見時難別亦難，春風無力百花殘。我當然明白，以我嘅性格，根本冇可能會 同你相廝守終生，但如果可以擁有過，總比錯過好。一路走來，都有Mr I喺身邊陪著我，我亦都曾經發過誓要陪佢好一段日子，但變咗質就係變咗質，勉強，從來都唔會引領我去幸福處。

　　呢個決定係殘忍嘅，當中包括背叛、犧牲，我曾經質疑過呢個決定，可惜一介血肉之軀，根本就冇法抵擋你嘅誘惑。我知我要付出嘅代價非常沉重，但不經一番寒徹骨，何來梅花撲鼻香？唔，親愛嘅r F，我決定咗今日weekend就帶你番屋企。

　　至於Mr I你呢，應該都唔會送你走嘅，做住後備，愛嚟聽下歌睇下相都好 ~