文章分類: 愛。Miao。 (盛夏。光年。)

800MP CCD。續。

jimfactory — Mon, 29 Dec 2008 21:04:23 +0800

早兩日upload咗唔記得放，
真係超仔細㗎 ~ 靚過好多D-cam ~

800MP CCD。

jimfactory — Fri, 26 Dec 2008 23:06:23 +0800

感受下800萬CCD嘅威力啦 ~

入會。

jimfactory — Sat, 16 Aug 2008 21:33:07 +0800

三貓當中，論人氣度，黑咪一向偏低。唔好講其他人呀，屋企人個個都鍚哂阿豹，讚佢夠乖夠純。嗲精比比一味靠嗲都搶到唔少分，唯獨黑咪性格孤僻一直都得唔到人歡心。其實如果講乖，黑咪都唔輸蝕，成日自己柄埋一二邊瞓覺，唔嘈唔煩唔扭計，可惜成身黑掘掘個個都嫌佢邪釘唔like佢，作為貓奴嘅我一直都唔係咁開心。

(閱讀全文)

劈腿。

jimfactory — Mon, 28 Jul 2008 00:23:20 +0800

熱爆，間屋熱到想溶咁。開行冷氣都仲係覺得好熱，下年要換喇個冷氣。驚三貓熱過頭會中暑，等登加咗幾舊冰落啲水度俾佢哋飲，可惜天氣實在太熱，冰都溶埋，唉，快啲落雨涼番啲啦 ~

試糧筆記。Iris美食杯。

jimfactory — Mon, 21 Jul 2008 00:31:07 +0800

等咗大半個月嘅貓糧終於抵港，唔怪得啲人咁貴都走飛機啦，日本咁近都要成廿日至到。由於今次主力訂貓小食，所以睇落好似好細盒咁，大嗱嗱成二千個大洋就咁冇咗喇，我不斷咁安慰自己，食一年㗎嘛，貴啲都值嘅。訂得最多最嘥位嘅依係Sheba小食，慣哂嘴，晚晚都開一包俾佢哋食，依家一聽到聲就已經識走位等食。

(閱讀全文)

乾杯。II。

jimfactory — Sun, 22 Jun 2008 21:31:57 +0800

HoHoHo，星期日，貓奴日。前晚訂貓糃嗰陣至知，原來雜貨做埋會員會有九折優惠，貓咪生日月仲會有八折，正，年終唔少 ~ 呢款貓咪啫喱 Iris 網賣緊290 Yen，宜家九折埋都共不過係$22.5，唔駛特登去日本網訂啦，運費真係唔平。

一次過買哂四隻味俾三貓食，慢慢試。今日開咗深藍色俾三貓食，反應唔錯。不過計落其實都幾乸脷，成$3蚊杯，終於記番起點解當初唔再買喇，一罐Applaws同埋Ciao都係$11蚊，咁細杯嘢竟然要成$3蚊！？個packing係就真係幾得意嘅，但係一杯唔夠三貓分，一貓一杯又同開罐頭差唔多，都係買番Applaws算喇，話哂都啖啖肉呀 ~

唔知啲貓小食幾時到呢？上次都等咗成廿幾日至到香港，日本嚟香港咋喎？

寵物雜貨：http://www.petss.net/index.do (平時九折，貓咪生日月八折）

乾杯。

jimfactory — Sat, 21 Jun 2008 00:25:00 +0800

好耐都冇買過小食俾主人喇，除咗間唔中買下 Friskies 啲潔齒小食之外，都冇買過咩俾貢品俾佢哋。今日放工 seafood 痕逛咗陣葵涌廣場，食三樓寵物店冇咩人幫襯咪入去睇下有咩買，又俾我搵番呢款貓啫喱。

其實都唔算係咩新嘢，頭一水買訂貓小食嗰陣已經喪入咗十幾排，但唔夠一個月豹豹同黑妹都已經食鬼哂。之後因為要去減啲貨所以一直都冇再入貨，是夜又俾我撞番，見又食水唔深($25蚊)，咪買咗條番嚟俾三位主人食，唔駛一分鐘已經去咗兩杯，嘩，咁食法，好似食窮，慳啲食先 ~ 見訂開糧，喺雜貨度又買多咗幾條，連埋響快適網訂嗰啲，應該都夠食到下年暑假喇掛 ~ ?

睡寶寶。豹豹。

jimfactory — Sun, 15 Jun 2008 23:51:05 +0800

尋晚放咗黑咪啲睡相上嚟，今晚輪到心肝綻豹豹，三貓中最錫佢，雖然比比成日爭寵，但係始終都係最錫豹爺 ~ 咩角度都係咁kawaii ~

睡寶寶。黑咪。

jimfactory — Sun, 15 Jun 2008 23:49:56 +0800

可能近排天口興，朝朝早都見到黑咪瞓響我書枱底，睇個勢個位都應該幾涼幾C服。幾隻嘢成日都爭住瞓，為咗爭呢個位晚晚都鬼殺咁嘈，上嚟同我瞓𥱊咪仲涼，犯賤 ~

糟躓。

jimfactory — Sun, 01 Jun 2008 20:30:43 +0800

近排真係忙到爆，日日唔係開會就係番學，蛇都死。難得早收工去行街街，響十蚊店買咗支非常抵玩嘅貓棒俾三貓，最愛十蚊店。豹豹繼續玩失蹤，比比玩兩嘢就厭，都係黑咪最好糟躓 ~

Mario。

jimfactory — Mon, 19 May 2008 00:29:16 +0800

我覺我真係俾 Apple 攪到我過敏症發作，話買個 500G hard disk 講咗好悶，但都係得個諗字，硬係覺得好快會跌價。須知道 iMac 同 iPhone 嘅經驗話我知，見到新嘢出就即刻買，過咗頭啖湯就等佢跌價至好買，大拿拿幾千蚊咁就俾人呃咗，夠我去轉台灣喇 ~

是夜途經朗豪坊，見到個人咁高嘅 Mario，好想攬住影番張相，但係咁多人望住，都係唔好喇，畢竟都挨近三張嘢，咪顛啦 ~

豹豬。

jimfactory — Mon, 19 May 2008 00:26:25 +0800

做我哋空運呢行，臨大時大節前都總係忙到抽。尤其近排公司推咗個咩 China promotion rate 出嚟，個個都係新客，齋 setup 都已經 set 到想喊，整埋整埋咁多嘢都唔知係咪會做得長，激死。

忙番工忙番學忙 iPhone 忙世界樹迷宮，都冇時間打理三貓。早兩日豹豹打針都係老媽幫手的佢去。未入到門口老媽已經打嚟話豹豹超重，成 3.5 kg，要減肥。咦，我上個月帶佢去見 vet 都未夠 3 kg，典解無啦啦會重咗成磅㗎？唔通真係隻 Innova 累事？食埋呢包都係唔買喇，肥嘢多病痛，感同身受。

打完針嗰晚做咗一晚嗲精，豹豹都好耐冇扭抱，雖然責到我大脾好痺，一晚半晚，頂硬上 ~

1Shot。

jimfactory — Wed, 07 May 2008 00:47:37 +0800

繼續iPhone exploring，玩唔厭。download咗幾個影相software，1Shot最好用，全人手式防手震，部機唔郁唔震就會自動影相，永冇out-focus。搵兩大寶貝試玩，效果不過不失啦，冇閃光冇對焦冇微距，純snapshot，好lomo feel ~ 難得孖寶心情靚絕唔四圍望，可惜都仲係未影到波波眼。

鳴，好想影波波眼呀 ~

大頭照。咪。

jimfactory — Fri, 25 Apr 2008 23:53:55 +0800

三貓當中，最情緒化莫過於黑咪，心情好真係嗲到你死，推佢落地轉頭又跳番上你大脾，再推再跳。朝朝七點鬆啲又鍾意捐入被竇逼你摸佢，唔理就成隻得上你塊面度，刁蠻到不得了。

＊　扭抱中　＊

大頭照。比。

jimfactory — Fri, 25 Apr 2008 23:51:31 +0800

唔知係咪涼啲呢，三貓一向都鍾意瞓櫃頂。不過瞓得最多嘅就梗係比爺啦，朝朝早起身都見佢瞓咗響度，任摸唔嬲，係衰在晚晚擒上擒落到死，打又唔驚鬧又唔驚，縱壞哂 ~

比比瞓緊嗰陣好鍾意人摸，唔開眼㗎，係 fing 下條尾示意 enjoy 中㗎咋 ~