文章分類: 愛。大世界。 (盛夏。光年。)

Discotheque Asia。

jimfactory — Wed, 13 Aug 2008 21:51:46 +0800

哈，唔駛講喇掛 ~

盛裝舞步。

jimfactory — Sun, 10 Aug 2008 22:55:15 +0800

多得大比帶挈可以去睇奧運馬術，當然，要付出沉重嘅代價。晨咁早去大學站搭車入場，眼瞓到爆，唔，預咗會悶，但睇睇又覺得其實都OK好睇嘅，係睇唔明啫。

仲以為公司會有個booth擺響會場度，點知搵極都搵唔到，個logo仲細到不得了，原來我哋唔係大會贊助商，而係大會獨家供應商，hohoho~

愛戀台北。食遊。

jimfactory — Mon, 07 Jul 2008 20:38:18 +0800

去台灣玩主打就梗係食食食，同埋食食食㗎啦。不過講開就真係慚愧，次次去親食嚟食去都係嗰幾間，因為實在太好食，唔願亦都唔想試其他。

你好魷魚羹

一個字，正 ~ 上次住長虹貪方便求其搵間肆正嘅舖頭食早餐，一試難忘，今勻特登去食多劑。

　推介：甜不辣，滷豆腐，肉丸湯

　地址：台北市萬華區漢中街34號（長虹、老天祿附近）

繼光香香雞（咕咕雞）

台語讀作咕咕雞，炸雞塊，細細粒，超香口，細嘅NT$50，大嘅都係NT$100，台北必食小食之一。

　推介：得一種，加辣惹味啲

　地址：通街都係，西門町、台北車站、淡水都有

　網址：http://www.no1ssg.com.tw/

日上鐵板燒

由當年鐵皮屋年代已經幫襯開，應該都有十年喇。嗰陣邊食邊流汗，好似好陰公咁，不過真係超好食，要試 ~

　推介：沙茶牛肉／羊肉，花枝蝦仁，荳芽菜

　地址：士林夜市熟食市場第一巷

綿綿冰

以前香港有好多地方有冰食，宜家好似執剩幾間，噢 ~ 行夜市熱到想斬人嗰陣不妨整兜綿綿冰吔，透心涼。

　推介：個人唔係咁鍾意芒果，桑莓最正

　地址：日上鐵板燒斜後面（有兩間，唔好去錯）

阿宗麵線

前排咪話旺角間阿土麵線食落好似阿宗嘅，原來係幻覺嚟㗎，阿土比較杰，似碗仔翅。正版阿宗濃度啱啱，仲加重咗木魚絲，香口好多。

　推介：得一款，可自行加酸加辣

　地址：總店響西門町，Sony Ericsson專門店附近

火鍋世家涮涮鍋

一真都好想食多次上次同Ling姑梅姨食嗰間迴轉涮涮鍋，但係已經搵唔番喇，鳴 ~ 是但搵咗間火鍋店搏下，哈，又俾我哋搏到喎，唔錯。裝修清雅（似我），食材豐富（過百款任你揀），仲要係唔算貴（100蚊港幣到）。算係咁㗎喇 ~

　推介：芝士包心丸，松阪雞肉（片到好似小肥羊咁薄）

　地址：師大夜市師大路

Mos Burger

情意結，行程幾咁密都一定要去Mos Burger。香港嗰間我一次都冇去過，冇feel ~ 台灣連大排檔都有feel過人，雖然嚟咗好多次，但我應該會keep住去，不過要等啲fuel減價先 ~

　推介：期間限定嘅所有包，個個月都有，唔驚試唔到新嘢

　地址：通街都係，去開西門町近萬事達嗰間

愛戀台北。貓空。

jimfactory — Mon, 07 Jul 2008 00:18:55 +0800

今次去台北，最開心嘅係終於坐到貓空喇，舊年聖誔撞啱佢例休所以冇得坐，幾唔開心呀 ~ 今次都差啲就坐唔到，因為有雷電，所以停咗成個下畫，喺隔離動物圍行到腳抽筋佢都仲未開，正想放棄走人嗰陣佢又開番，hohoho ~

同樣都係坐成大半個鐘，人哋貓空收你50蚊台幣，香港收你成舊咗，相差10倍有多，你話港鐵幾搶錢呀 ~ ! 遊走貓空，感覺同九份差唔多，但就冇大份咁污漕，仲多咗份貴氣。又唔駛坐成個鐘車轉嚟轉去，悲情城市宜家唔悲情㗎喇，人山人海。

去台北記住去貓空呀，去咗就唔駛去九份㗎喇，無謂嘥錢。

大世界。hactl。

jimfactory — Sun, 06 Jul 2008 01:02:14 +0800

上咗咁多堂，始於等到參觀hactl喇，真係要了我的命。難得可以行落停機坪親手摸下啲貨機，機會難逢，可惜真係熱到想斬人，個身乾咗又濕番，好難受。仲以為架747-400會好大，入到去至發覺原來都幾窄下。成班人柴娃娃咁圍住架機喪影，加埋過千歲，仲好似細路咁。

行番入去hactl倉，嘩，O哂嘴，成間怪獸公司咁，好systematic。難得可以參觀埋個凍倉，凍到黐哂線，班顛人當然又係咁喪影，唔得佢死 ~ 雖然個個星期四同星期六都要趕頭趕命，不過為咗參觀hactl，辛苦啲都OK ~

愛戀台北。仨。

jimfactory — Fri, 04 Jul 2008 00:00:01 +0800

走火入魔，以前一年一次，宜家縮到半年一次，遲啲可能隔個月就去一次。難得碟姐肯撥冗出席，識咗咁多年都冇一齊去過旅行，下次又唔知會係幾時。去咗好多之前冇去過嘅地方，最開心嘅係始終坐到貓空，嘻，超靚 ~ 雖然世界好大，但台北，始終會再去。

開始計劃緊下一次旅行，好想去西班牙逛世博，又想去倫敦睇Madonna，更想去布拉格完多年夢想，唉，點解我咁窮㗎 ~

當世界無玫瑰。

jimfactory — Sun, 27 Apr 2008 16:00:01 +0800

喺 Angela 不斷教峻之下，我終於忍唔住買咗 iPhone 喇。整體感覺唔錯嘅，係影相差啲囉，嚴格嚟講，係差好多囉。冇閃光冇微距冇對焦，心血來潮玩下咪得囉，想影張似樣嘅都有難度。不過 OK 啦，始終 iPhone 多嘢玩過部爛鬼 Viewty，無限樣可能嘛。唉，寧願晏畫食包慳啲買番部 D-cam 最實際。

是夜紅館睇關淑儀，OK 啦，不過不失，氣氛同 Starlight 冇得比，但就真係超靚聲。感動位拿捏得恰到好處，老屎忽就係老屎忽，夠火喉，dup 落有味，回甘。可惜冇唱《當世界無玫瑰》，若有所失。

會後短聚釋囚姐姐，算你大命，咁都告你唔入。香港司法制度再一次令人失望，顏福偉落落大方可能要坐監，姐姐死口唔忍反而逍遙法外，天理呢？死咗去邊？！當然，姐姐唔駛踎監故然開心，但至少要俾小小教訓佢嘛，如果唔係下次咪又試亂咁摸人？

激鬼氣，點做法官㗎？